Kakaeny (काकन्य)

Author: Vishal Kachroo

Narration: Vishal Kachroo

---

काकन्य

विशाल काचरू (Vishal Kachroo)

“हया कुसु प्राह गॊय!” काकनि कॅर बॆयॖ म्यॉनिस बॉयिस ब्यवॉरी। अदॖ करिहॆस ना। तॆम्य ओस बॆयि काकनि हुंद तरंगॖ दारि किन्य दॉरिथ द्युतमुत।

दरॅसल ऑस दलील यि कि काकन्य ऑस दॊहय ब्रांदस प्यठ बॆहान। स्व ऑस सॉन्य बडॖ नान्य। बॖ तॖ म्योन बोय ऑस्य दॊहय तॆमिस सुबन सुबन चीरॖ नालमॊत करान। सु ऑस असि पनिनि ल्वकचारॖच कथॖ बडॖ चावॖ सान बोज़नावान। बॖ ओसुस नव वुहुर तॖ म्योन बोय ओस काह।

तथ वरमुल्य किस मकानस ऑस्य बेशुमार कमरॖ। मगर ब्रांदस युस ख्वशयुवुन ताफ ओस आसान तॖ युस सर सर करान वाव ओस वुडान, तम्युक ओस नॖ कांह जवाब।

बाबी, म्यॉन्य नान्य, ऑस काकनि सुबहॉय चाय अनान, चायि सॗत्य फुलकॖ च़ॊम्बॖरॖ, यॖ ओस मामूल याने routine. यपॉर्य रटेय काकनि चाय तॖ फुलकॖ, तॆमिस ऑस्य द्वनवय अथॖ गछ़ान आवॖर्य, हुपॉर्य ओस म्योन बोय जल जल तॆम्यसुंद तरंगॖ तुलान तॖ दडाम!!

“हया कुसु लास ओसमय च़ॆ मॆ च़ूरि कॊरमुत परू-ज़नमस मंज़” “यीनय मोल, अज़ करनावय शलख”। बॖ ओसुस हना शरमदार, काकन्य ऑस हमेशॖ मॆ तरंगॖ वापस ह्यॊर खारनॖ खॉतरॖ वनान, युस मॆ मोतॖ खॊतॖ सख ओस गछ़ान। यॆलि नॖ मॆ कांह गलती ऑस कॅरमॖच़, बॖ क्याज़ि बुगतॖ तॆम्युक फल!

वारयाह ज़ारॖपारॖ तॖ ऑही पतॖ ओसुस बॖ रॉज़ी गछ़ान तॖ कुनी टॖकि गछ़ान तॖ काकनि हुंद तरंगॖ तमिस वापस दिवान। वैसे ऑस असि काकनि हॅंज़ स्यठा माय, शायद पनिनि नानि ख्वतॖ ति ज़यादॖ, मगर ल्वकचारस कति ओस यॖ समॖज यॖवान।

ॲस्य ऑस्य रोज़ान सिरीनगरॖ तॖ काकन्य ऑस रोज़ान वरमुलि म्यॉनिस बुडिबबस सॗत्य। बड्यन दॊहन प्यठ ऑस्य ॲस्य वरमुल वसान। काकन्य ऑस हमेशॖ असि वॖछिथ ख्वश गछ़ान।

अकि दोह आयि ॲस्य सकूलॖ प्यठॖ वापस तॖ वुछ डैडी जी, म्योन अंकॖल, सानि गरि। वैसे ओस सु हमेशॖ मसखरी करान मगर अज़ ओस बडॖ उदास मूडस मंज़। म्यानि माजि निय ॲस्य द्वनवय दॊयमिस कमरस मंज़ तॖ वॅनॖन्य असि शॆछ्य।असि च़ॊल ज़नॖ ख्वरव तलॖ ज़मीन नीरिथ।

कॆंह दॊह पतॖ वॅथ्य ॲस्य वरमुल। सु ब्रांदॖ ओस छ़ॊरुय। मॆ दिच़ दारि किन्य ब्वन नज़र। मॆ तुज टॖख बॊन, सु तरंगॖ छ़ांडनि। म्यॉन्य बॉय रॊटनस बॖ नालॖमति तॖ ह्यॊतुन वदुन। ॲस्य बीठ्य तथ ब्रांदॖ किस कूनस मंज़ शाम तान्य, सोचान तॖ प्रारान॥