वेताल पच्चीसी : कथा सरित सागरुक अख हिसॖ 

अनुवाद : म.क.रैना, मुम्बई 

वेताल पच्चीसी : कथा सरित सागरुक अख हिसॖ 

मूल लेखक : सोमदेव पॅंडित 

अंग्रीज़्य अनुवाद : सी.एच.टावनी तॖ एन.एम.प्यंज़र 

कॉशुर अनुवाद : म.क.रैना, मुम्बई 

 

वेताल पच्चीसी : पॊत मंज़र 

वेताल पच्चीसी हॖंज़ॖ कथॖ छि, दर-अस्ल हिदुस्तॉनी कथन हुंद अख प्रोन बंडार, युस पंचतंत्रस मंज़ मूजूद छु। यिमॖ कथॖ छि नॖ सिर्फ, सोमदेवॖनि कथा सरित सागॖरस या तमि ब्रोंठ क्षेमेंदरॖ सॖंज़ि ब्रहत कथा मंजरी, मंज़ॖय योत लेखनॖ आमच़ॖ बॅल्यकि छु अम्युक ज़िक्र, दुनियिहॖचन वारयाहन ज़बॉन्यन मंज़। हिदुस्तानस मंज़ ति छु यिमन कथन हुंद तर्जमॖ, तकरीबन प्रॆथ ज़बॉन्य मंज़ करनॖ आमुत। शिवदासॖ सॖंज़ि लीछिमॖच़ि किताबि मंज़ ति छु यिमन कथन हुंद ज़िक्र, तॖ दपान सु छु कथन हुंद असली रॗफ। शिवदासॖ सॖंज़ॖ कथॖ छि, कॆंह गद्य तॖ कॆंह पद्य, यानी कॆंह प्रोज़ तॖ कॆंह पोइटरी मंज़ लेखनॖ आमच़ॖ। 

    दपान वेताल पच्चीसी हुंद ग्वडन्युक तर्जमॖ छु आमुत, संस्कृतॖ प्यठॖ बृज-भाषायि मंज़ अरदॉह्यमि सॅदी हॖंदिस, शुरूहस मंज़ करनॖ। बृज-भाषा ऑस मथुरा तॖ आगराहस ॲंद्य पॅख्य अलाकन मंज़ यिवान बोलनॖ। यि तर्जमॖ ओस सूरती मिश्रा हन, सवाई जय सिह सॖंदिस हुक्मस प्यठ, मुहम्मद शाह सॖंदिस हकूमतस मंज़ कॊरमुत। सवाई जय सिह ओस जयपोरुक राज़ॖ। 

    लालू लायन कॊर 1805स मंज़, वेताल पच्चीसी हुंद तर्जमॖ बृज-भाषायि प्यठॖ हिदीयस मंज़। काली कृष्णन कॊर 1834 हस मंज़ लालू लायॖ सॖंदिस हिदीयस अंग्रीज़्य तर्जमॖ। 

    सी.एच.टावनीयन कॊर वेताल-पच्चीसी हुंद (य्वसॖ कथा सरित सागरुक अख हिसॖ छि) तर्जमॖ संस्कृतॖ प्यठॖ अंग्रीज़्यस मंज़ 1880-1884स मंज़, तॖ एन.एम.प्यंज़रन कॅर अथ प्यठ मॅज़ीद कॉम, 1924 प्यठॖ 1927 हस ताम। ​

​

असॖल कथ 

अख तांत्रिक छु, यि छु विद्यादरन प्यठ यछ़ान हकूमत करॖन्य। अमि खॉतरॖ य्वसॖ यि कॉम करान छु, अथ मंज़ छि ॲमिस, ॲकिस खास वेतालॖ सॖंज़ि बली हॖंज़ ज़रूरथ। यि वेताल छु ॲकिस शुमशानस मंज़ वास करान। यि रॅटिथ अनुन छॆनॖ सॅहल कथाह कॆंह। ॲमिस हॆकि राज़ॖ त्रिविक्रमसेनस ह्युवुय, कांह बलवीर कुलि प्यठॖ वॉलिथ तॖ तांत्रिकॖ सुंद गरॖ वातॖनॉविथ। दपान राज़ॖ त्रिविक्रमसेनस ओस, इंद्र राज़स बराबर ताकथ। 

    तांत्रिक छु यछ़ान राज़ॖ त्रिविक्रमसेनस ति खत्म करुन, युथ नॖ तस बुथि कांह रुकावट यी। यि सूंचिथ छु यि तांत्रिक ॲकिस दरवेशॖ सुंद रॗफ दारान तॖ राज़स वरगॖलावनॖ खॉतरॖ अख ज़ाल वोनान। 

    राज़स अपुज़ वॅनिथ तॖ तस सॗत्य फिरेब कॅरिथ छु यि तांत्रिक तस पानस सॗत्य करॖनस मंज़ कॆंहस हदस ताम कामयाब गछ़ान। पतॖ क्याह छु सपदान, ति वनुन छुनॖ यॆत्यथ ठीख। सु लगिवॖ त्वहि कथॖ पॅरिथॖय पताह।  

​

राज़ॖ त्रिविक्रमसेन तॖ वेताल 

गोदावरी हॖंदिस बॅठिस प्यठ छि अख जाय यथ नाव छु प्रतिष्ठान। दपान पथ कालि ओस अति अख राज़ॖ रोज़ान यस नाव ओस त्रिविक्रमसेन। यि ओस विक्रमसेनॖ सुंद नॆचुव, ताकॖतस मंज़ ओस यि इंद्रस बराबर। ॲम्यसॖंदिस दरबारस मंज़ ओस प्रॆथ द्वह अख दरवेश यिवान, यस नाव ओस क्षांतिशील। दरवेश ओस राज़स नमस्कार करान तॖ अख म्यवॖ दिवान। राज़ॖ ओस यि म्यवॖ पनॖनिस खज़ानॖकिस मुन्तज़िमस दिवान तॖ मुन्तज़िम ओस यि शॉही खज़ानस मंज़ जमाह करान। यिथॖ पॉठ्य गुज़रेयि दॅह वॅरी। 

    अकि द्वह यॆलि यि दरवेश राज़स म्यवॖ दिथ द्राव, राज़स ब्रोंठॖ कनि आव महल खानुक अख पॊंज़ युस पनॖनिस मुहॉफिज़स निशि च़ॅलिथ ओस आमुत। राज़न द्युत यि म्यवॖ ॲमिस पॅंज़िस ख्यनॖ खॉतरॖ। युथुय पॅंज़्य यि म्यवॖ ख्यॊन ह्यॊत, अथ गॅयि ज़ॖ हिसॖ तॖ अमि मंज़ॖ द्राव नपॖ नपॖ करवुन अख लाल। राज़न वुछ यि तमाशॖ, लाल तुलुन पनॖनिस अथस मंज़ तॖ वॊनुन पनॖनिस खज़ानॖकिस मुन्तज़िमस,'त्वहि कति थॅविवॖ तिम सॉरी म्यवॖ यिम यि दरवेश मॆ दिवान ओस तॖ बॖ ओसॖसवॖ त्वहि हवालॖ करान?' मुन्तज़िम गाबॖर्यव यि बूज़िथ तॖ वॊनुन राज़स, 'बॖ ओसुस तिम नॆबरॖ प्यठय खज़ानस अंदर दिवान दॉरिथ। हरगाह हॊकुम आसि, बॖ मॖच़रावॖ खज़ानुक दरवाज़ॖ तॖ वुछॖ। राज़ॖ सुंद हॊकुम रॅटिथ द्राव मुन्तज़िम खज़ानस कुन तॖ कॆंह कॉल्य पफ्यूर वापस। तॅम्य वॊन राज़स, 'राज़ॖ, तिम सॉरी म्यवॖ छि हॊत्यमॖत्य मगर गाह त्रावॖवॖन्यन लालन हुंद अख अंबार छु पथ कुन रूदमुत।' राज़ॖ गव यि बूज़िथ ख्वश। 

    दॊयिमि द्वह, यॆलि दरवेश बॆयि राज़स निश आव, राज़न वॊनुस, 'च़ॖ क्याज़ि छुख द्वहय मॆ यि लाल बॅरिथ म्यवॖ दिवान। अज़ रटय नॖ बॖ यि म्यवॖ कॆंह हरगाह च़ॖ अम्युक राज़ वनख नॖ।' 

    राज़ॖ सॖंज़ कथ बूज़िथ गव दरवेश तस ब्रोंह कुन तॖ ल्वति पॉठ्य वॊनुनस, 'राज़ॖ, मॆ छु अख जादू-मंत्र करुन यथ मंज़ मॆ ॲकिस बहोदुर इनसानॖ सॖंदि मदतॖच ज़रूरथ छि। बॖ छुस यछ़ान, तॊह्य कॅरिव मॆ अथ मंज़ मदद।' राज़न कॊरुस आंकार। दरवेशन वॊनुस, 'बॖ प्रारोवॖ त्वहि बुथि यिनॖ वॉलिस गटॖ पछॖ शामस बॅडिस शुमशानस मंज़। बॖ आसॖ तॅती बरगदॖकिस कुलिस तल प्रारान। तॊह्य समॖख्य ज़्यवॖ मॆ तॅती।' राज़न कॊरुस आंकार। दरवेश गव ख्वश। 

    यॆलि मुकर्रर द्वह आव, राज़न वॊल क्रुहुन कपुर पनॖनिस कलस, तलवार तुजिन अथस मंज़ तॖ द्राव च़ूरि पॉठ्य कुनि खोफॖ वरॉय शुमशान बल कुन। अनि गटॖ ऑस सख। शुमशानस मंज़ आसॖ लाशि दज़ान यॆमि सॗत्य ऒंद-पॊख ज़्यादय खोफनाख ओस बासान। शुमशानस मंज़ ऑस्य इनसानॖ कलॖ, क्रंज़ तॖ ॲड्यजि जायि जायि पथर। भूत तॖ वेताल ऑस्य हॉबथनाक खिदॖ करान तॖ शाल ऑस्य जायि जायि टुंगान। राज़न दिच़ ओरॖ योर नज़र। दरवेश ओस बरगदॖ किस कुलिस तल बिहिथ पॅथिरॖस प्यठ गोल शक्लॖ बनावान। राज़ॖ गव तस निश तॖ वॊनुनस, 'दरवेश, बॖ आस पनॖनि वादॖ मुतॉबिक। वन मॆ क्याह छु करुन?' 

    दरवेशन युथुय राज़ॖ वुछ, सु गव ख्वश। दॊपुनस, 'राज़ॖ, बॖ छुस तुहॖंज़न ॲछन मंज़ अख ज़ॖच़ वुछान। त्वहि छु यॆति प्यठॖ स्यॊदुय दक्षिनस कुन गछ़ुन। ॲकिस जायि यियि अख बॊड कुल। तथ कुलिस प्यठ छि अख लाश अलूंद। स्व लाश छि पानस सॗत्य अनॖन्य।' राज़ॖ ओस पनुन वादॖ पूरॖ करनॖ खॉतरॖ तैयार। तॅम्य वॊनुस, 'बॖ करॖ ती।' राज़ॖ द्राव दक्षिनस कुन। अनि गटॖ ऑस, मगर लाशि-हा दज़नॖ किन्य ओस वति रछ़ खंड गाश प्यवान। वातान वातान वोत सु तथ कुलिस निश। कुलिस ओस शुमशानॖकि दॖहि सॗत्य आमॖताव लॊगमुत, अमि किन्य ओस सु अनिगटि मंज़ यॊहय भूत ह्यू बासान। च़्ववापॉर्य ऑस इनसानॖ माज़ दज़नॖच मुशिक। राज़न त्रॉव कुलिस ह्यॊर कुन नज़र। कुलिस प्यठ ऑस अख लाश तिथॖ पॉठ्य अलूंद, ज़न तॖ कांह वेताल तथ नख दिथ ओस। राज़ॖ खॊत कुलिस। तथ रज़ि द्युतुन टख यॆमि सॗत्य लाश गंडिथ ऑस। लाश पॆयि पथर। पथर प्यवानॖय दिच़ अमि लाशि बडि क्रख, ज़न तॖ तस सख तकलीफ वोत। राज़स बास्यव ज़ि लाश छि ज़िदय। तॅम्य द्युत तसॖंदिस पानस आराम वातॖनावनॖ खॉतरॖ फश। लाशि त्रोव बडि असुन। राज़स तॊर फिकरी ज़ि लाशि अंदर छु वेताल बिहिथ। राज़न वॊनुस, 'असान क्याज़ि छुख? मॆ छुख च़ॖ पानस सॗत्य न्युन।' मगर यीतिस कालस खॊत वेताल वापस कुलिस प्यठ। राज़ॖ ओस स्यठाह बहोदुर। सु खॊतुस पतय तॖ रॅटिथ वोलुन वापस। 

    राज़ॖ त्रिविक्रमसेनन थॅव यि लाश, यथ मंज़ वेताल च़ामुत ओस, पनॖनिस फॆकिस प्यठ तॖ ह्यॊतुन कदम द्युन। लाशि अंदर बिहिथ वेतालन वॊनुस, 'राज़ॖ, सफर छुय स्यठाह। थकुन च़ॅलॖरावनॖ खॉतरॖ बोज़ॖनावथ बॖ ॲकिस राजकुमारॖ सॖंज़ दॅलील। वारॖ बोज़। 

☯☯☯